A pesar de que a organización da primeira Copa da Raíña supuxo un inxente traballo durante os últimos dous meses para toda a estrutura do Pescados Rubén Burela, a secretaría técnica da entidade non distraeu a planificación deportiva para a próxima tempada e xa puido amarrar dúas incorporacións.
Se nada se torce a última hora, ao persoal burelista chegarán este verán dous futbolistas que estiveron esta pasada fin de semana en terras mariñás disputando o torneo copeiro. Trátase das futbolistas do Poio Pescamar Jenny Lores e Ale de Paz.
A pontevedresa Jenny Lores, de 28 anos, é un peche que tamén pode xogar de á e destaca pola súa intensidade, o seu bo disparo e unha depurada técnica individual. Cumpriu a súa quinta tempada no Poio, onde chegou desde o Marcón pontevedrés. Foi a capitá e unha peza fundamental do cadro poiense nas últimas campañas.
Pola súa banda, Ale de Paz pecha unha etapa de catro cursos no cadro conserveiro. Natural de Neda e de 24 anos de idade, esta á-peche chegou a Poio procedente do Valdetires ferrolán, co que debutou en Primeira División. De Paz ten características diferentes a Lores, aínda que ambas poden desenvolverse na mesma posición. Na ferrolterrana sobresae a súa intelixencia táctica, o ben dotada que está tecnicamente e a súa boa calidade de pase.
CAMI. Estas dúas chegadas provocarán que se produzan algunhas saídas na escuadra laranxa. Unha delas podería ser unha das futbolistas que mellor tempada callou. A brasileira Cami abandonará o conxunto burelense de forma momentánea, ata o próximo mes de decembro, cando regresaría á disciplina do Pescados Rubén logo de arranxar unha serie de trámites académicos no seu país.
