Dúas persoas, un motorista e un viandante, foron trasladadas a última hora da tarde deste martes ao Hospital da Mariña por un accidente que se produciu ás 20.33 horas na Avenida Arcadio Pardiñas de Burela. O suceso produciuse cando un motorista dun coñecido restaurante de Burela intentou evitar a unha persoa que cruzaba por un paso de peóns no centro urbano burelense. Froito da manobra, o condutor da moto, que responde as iniciais L.M., foise ao chan nun momento onde chovía bastante.
A persoa que neses momentos cruzaba polo paso de peóns tamén foi alcanzada pola motocicleta. Segundo algunhas testemuñas, o condutor da moto estivo uns minutos no chan sen poder moverse e queixábase das costas. Menos danos parecía ter o viandante.
Ata o lugar dos feitos acudiu o 061 que evacuou ao motorista ao centro sanitario, e tamén a Policía Local da localidade mariñeira. O peón tamén foi ao Hospital, máis ben por precaución.