O mosteiro dominico de Valdeflores de Viveiro volverá a quedar baleiro coa marcha definitiva das monxas que quedaban nel. Sor Antonia –que se foi a casa duns familiares a mediados de setembro pero regresou– xa foi trasladada o mércores pola mañá ao convento que a Orde de Predicadores ten en Baiona, mentres que sor Carmen e sor Consuelo iranse, respectivamente, a residencias de Ferrol e Mondoñedo "a primeiros da semana que vén", segundo indicou sor Carmen a este xornal. A relixiosa recoñece que estes últimos días na que foi a súa casa durante practicamente toda a súa vida son "moi emotivos. O despedirse da casiña de sempre, como podes comprender...", comenta emocionada a monxa.
"Están moi desgustadas; levaban toda a vida xuntas e querían seguir xuntas"
A confraría e o barrio de Xunqueira viven con pena e certo enfado a marcha das monxas dominicas. "Están moi desgustadas, como van estar, levan toda a vida xuntas e querían seguir xuntas", manifesta o presidente do colectivo confrade, Luís Ramón López, quen opina que a decisión da Orde de Predicadores de separalas "non ten nome, foi unha falta de caridade total". Na confraría senten "unha pena tremenda" pola marcha das monxas e queren saber que ocorrerá co edificio. "Axiña que se marchen xa pasa á Orde. Eu tiña noticia de que nin se pechaba nin se vendía, pero a ver logo que queren facer con el, o pobo ten dereito a sabelo", apunta López.
Desde a confraría tamén recoñecen que a campaña para recoller firmas co obxectivo de que reabrise o convento tras a marcha anterior das monxas non sentou ben na Orde de Predicadores.
