Catro montañeiros de Ribadeo conquistaron o pasado sábado a cima do Mont Blanc. Os alpinistas, membros do grupo de montaña Pena Tallada, escalaron 4.810 metros ata o cume da montaña, alcanzando o punto máis elevado de Europa Occidental.
José Regueiro, Marcos Méndez, José Caloto e David Canoura lograron o seu obxectivo en oito horas desde o refuxio de Tête Rousse, a 3.156 metros.
Segundo explican os propios protagonistas, conseguiron chegar á cima da montaña "sen guía e soportando en cume ventos de ata 40 quilómetros por hora" e unha sensación térmica de 20 graos baixo cero.
Os montañeiros ribadenses alcanzaron o cume do Mont Blanc un mes despois que a súa compañeira de grupo Núria Fernández.