O Observatorio da Mariña pola Igualdade organiza este sábado ás 20.00 horas no auditorio Hernán Naval de Ribadeo a actuación teatral Monstruación, da compañía Enconarte. A entrada ao espectáculo terá un custo de tres euros.
A obra, que contén trazos de crítica mediante o humor, promete deixar pegada na localidade ribadense. Tres actrices —Rocío Romero, Arantxa Treus e Déborah Vukusic— encarnan o papel de tres das bonecas máis famosas da década dos 80 e 90: unha barbie, unha nancy e unha barriguitas india personalizándoas dun xeito infantil e inocente, coma se fosen nenas.
Ao longo do espectáculo, detállase aos personaxes. Bárbara ten millóns de ocupacións profesionais, conta con moitas operacións de cirurxía estética e está casada con Ken. Pola súa banda, Nansy é unha esquiadora de elite en Alacante, que ve como a súa vida persoal e profesional se ve interrompida. Barri é unha emigrante dunha reserva india, que traballa como teleoperadora no teléfono da esperanza, ademais de estar casada cun dos seus curmáns co que ten unha chea de fillos e non quere manter relacións sexuais.
O relato desenvólvese desde que a súa dona, América, deixa de xogar con elas porque comeza a menstruar e ve como o seu corpo se modifica. A partir dese momento, as bonecas especulan sobre aspectos relacionados con este cambio hormonal, como parrocha —como se coñece popularmente aos xenitais femininos—. Con iso pretenden abarcar temas a priori tabús para a sociedade mediante o humor.
O espectáculo tamén contén críticas sobre o fenómeno da disglosia en Galicia. En certos momentos rompe a barreira entre público e o escenario, deixando o papel das bonecas para volver ser Déborah, Arantxa e Rocío, onde chegan a dirixirse directamente aos asistentes. A pesar de que a función comeza en galego, cambian de idioma ao castelán, evidenciando que, ao representar a mulleres novas cultas e, do ámbito urbano, predomina o uso do español, aseguran.