O Concello de Mondoñedo e a Asociación de Comerciantes da localidade presentaron unha campaña coa que queren concienciar á cidadanía da importancia de axudar ao comercio local durante as compras do próximo nadal. Para facelo elaboraron un vídeo de promoción e chamaron á campaña #regalamondoñedo. O vídeo insiste precisamente na concienciación nas compras de proximidade.
O goberno municipal reseña que é importante "consumir produtos de Mondoñedo pola transcendencia que ten coidar o noso, especialmente nun momento complicado coma o actual debido á pandemia do coronavirus que afectou a todos en xeral e aos pequenos negocios, o comercio e a hostalería local en particular".
Por iso o alcalde, o popular Manuel Otero, recalca que "máis ca nunca, debemos apoiar aos nosos veciños que traballaron durante ou confinamento da pasada primavera coidando os seus produtos ou garantindo a atención nos comercios para abastecernos de produtos básicos".
CALIDADE. Desde o goberno municipal tamén recordan que nestas compras sempre é importante "o trato próximo dos comerciantes" así como "a calidade dos produtos agroalimentarios de Mondoñedo. E, así mesmo, queremos poñer en valor outros atractivos do concello como a artesanía ou o patrimonio".
O vídeo recolle imaxes do municipio de Mondoñedo pero tamén dos seus produtos de horta, o seu patrimonio ou produtos gastronómicos máis emblemáticos como a torta ou o pan de Mondoñedo. Tamén reflicte o traballo dos artesáns e pide expresamente que todo iso se teña en conta á hora de realizar as compras dos próximos días.