O Concello de Mondoñedo dá un paso máis na súa loita contra o feísmo urbanístico, neste caso coa eliminación dun edificio sen uso na Avenida das San Lucas, en cuxo lugar se construirá unha zona axardinada, na que prevén tamén plantar árbores autóctonas, que contribuirán a mellora a imaxe dunha zona, moi transitada, situada entre a igrexa dos Remedios e o instituto.
"É unha dás vías máis dinámicas de Mondoñedo", asevera a alcaldesa, Elena Candia, que é consciente de que tras a derriba "a imaxe da rúa mellorará notablemente".
A construción que se derruirá é en realidade "un esqueleto formigonado", cuxos propietarios ademais de manter "en todo momento unha actitude colaboradora" cederon o uso do terreo temporalmente ao Concello, un xesto que agradece a rexedora mindoniense.
O ente municipal sacará a licitación a obra de derriba, para a que teñen reservado un orzamento próximo aos 70.000 euros; un diñeiro que se sacará da partida do premio Galicia Parabéns que recibiu a pasada primavera polo seu esforzo e compromiso co coidado da paisaxe e o patrimonio. Un galardón dotado con 400.000 euros.
Elena Candia informará a todos os veciños das xestións en marcha para embelecer Mondoñedo nunha reunión que se celebrará o luns, ás oito da tarde, no salón de plenos da casa consistorial.
