Velaquí un bo aparello, como saberán os afeccionados aos ralis e ás pelis de queimar roda, tipo Fast and Furious. Estamos ante o coche que tantas carreiras lle estragou ao Subaru Impreza WRX 2.5 STT, que é o meu preferido pero non o de Iago Vázquez. Este vivariense de Galdo rebuscó no mercado ata dar en Cantabria cun Lancer Evolution que adoita ser obxecto de desexo de moitos mozos.
O Mitsubishi é un coche para gozalo o fin de semana e darlle brasa nos circuítos. "Levaba dous anos aquí coas matrículas vermellas, pois viñera de Alemaña. Traballo instalando muíños de vento por todo o mundo e boto longas tempadas fóra dá casa, así que decanteime por este coche para disfrutalo cando veño".
Por suposto, non é o seu vehículo habitual. As vías mariñás non son o que necesita o Evolution IX e este resultaría caro de mover, por consumo e mantementos. "Teño ido ao circuíto do Xarama, é o que hai porque oxalá houbera en Galicia ou en Asturias un circuíto, cos afeccionados que somos ao motor é unha pena que ninguén o monte", explica. "As estradas están mal e tampouco son para correr porque é perigoso, así que deberían mirar o do circuíto. A min gústame conducir pero non ou pique, para iso están vos circuítos e aí miras tempos", insiste. Como viaxa, observa diferentes culturas automobilísticas: "Nas autoestradas alemás ves moito coche de alta gama, en Francia gústalles máis ou tunnig con equipos de son e suspensións neumáticas pero aquí vainos o estilo racing, da rúa".
Gustaríalle un Porsche 911 GT3 pero habería que porlle un cero máis ao prezo do Mitsu e "xa son palabras maiores"
E por iso un japo como o EVO IX atrae tantas miradas e é un bo investimento: "O mercado está en alza, é un coche que nunca vai perder valor porque para o afeccionado aos deportivos sempre vale e subirá de prezo; ademais, xa non se fabrica". Agora Mitsubishi fai todo camiños, híbridos... pero cando sacou esta máquina púxolle teito de aluminio máis lixeiro que o de chapa de ferro, para baixarlle un pouco máis o centro de gravidade, e unha culata con distribución variable, e peiraos máis curtos que no EVO VIII, sofisticados diferenciais central (autoblocante con embrague multidisco) e traseiro (que axuda a trazar, controlando a guiñada)...
Iago di que no seu o motor está de serie, cunha liña de escape Mongoose, amortiguadores Tein e unhas aletas Vortex no teito que traía o RS nun kit de Ralliart. Para os non iniciados todo soará moi sofisticado pero o certo é que o EVO IX viña de serie xa moi racing. Está calzado cuns pneumáticos semislicks en medida 255 e grandes freos Brembo para agarralo firme.
"Eu só lle puxen o kit do teito e uns reloxos de presión do turbo, temperatura de aceite e presión de aceite que ten Ralliart, aparte do spoiler de carbono na defensa. O alerón hei cambialo e xa teño o da versión VIII MR en carbono pero quédame pintalo", explica. "Quérolle facer cousas como unha admisión e intercooler máis grandes e quizais lle toque a electrónica para sacarlle 350 CV, algo máis de par motor porque en tramo xa é superáxil", engade.
Viña dun Renault Clio R27 que comprou en edición limitada para celebrar o mundial de Alonso do 2007 e volve ter outro R27, esta vez compartido coa súa parella, tamén moi racing.
Sobre o tunning di que "aquí pasou de longo, para min é moita macarrada pero non critico, cada un ó seu gusto". O EVO é outra historia. Necesita 50 litros para pouco máis de 300 quilómetros pero nada que ver con aquel primeiro Golf 3 90 CV diésel.
