Os mercados de produtos da zona que se veñen desenvolvendo en Ribadeo os domingos dende xuño remataron este domingo coa Festa da Horta, na que á parte de degustacións, un obradoiro de cestería ou un concerto, houbo no momento do pregón unha homenaxe a todas as mulleres que levan participado nestes mercados dende os seus inicios hai 16 anos e, en xeral, ao papel e traballo das mulleres no eido rural.
O pregón correu a cargo de Elia Rodríguez, muller dedicada dende hai 40 anos á agricultura e "pioneira" na ecolóxica, que participou nos mercados ata a súa xubilación o ano pasado. Fixo unha defensa da profesión e das posibilidades da produción ecolóxica na zona. Tamén interviu a concelleira de desenvolvemento local, Ana Martínez, quen lembrou "o que supuxo a muller para o rural, equilibrando o traballo entre a empresa familiar e a vida no fogar" e a "revolución" que supuxo para as mulleres rurais "conseguir dereitos como foi a titularidade compartida das explotacións e o que aportan elas de novidade e de empoderamento dentro das novas iniciativas do rural". Lembrou que precisamente este luns se celebra o Día Internacional da Muller Rural.
A presidenta da asociación de produtores locais A Sucadoira -que promove xunto co Concello os mercados-, Ana Díaz, tamén asistiu á festa, ao igual que o alcalde, Fernando Suárez, que lembrou os inicios desta iniciativa e defendeu as posibilidades do rural galego.
Na festa os 18 postos, na súa maioría rexidos por mulleres, ofreceron degustacións dos seus produtos e como novidade houbo outros stands convidados que tamén ofreceron aos asistentes castañas asadas ou zume de mazá elaborado no momento. Ademais, houbo un posto de plantas medicinais e cosmética natural e outro de setas e castañas. Un obradoiro de cestería cunha ducia de participantes e o concerto de Franklin Soul completaron a xornada.
Dende o Concello fan unha valoración moi positiva dos mercados, que á parte de poñer en valor os produtos hortícolas e artesanais da zona, serven aos produtores para ter un contacto directo co consumidor.