A ministra de Industria, Reyes Maroto, recibirá ao comité de empresa de Alcoa en Cervo "en breve", segundo afirmou o delegado do Goberno en Galicia, José Miñones, quen reiterou a súa petición á empresa de que ou ben execute un "proxecto real que manteña os postos de traballo" na Mariña "ou ben venda e permita que outra empresa entre para darlle esa necesidade de continuidade". Así se pronunciou Miñones este martes en resposta aos xornalistas sobre a postura do Executivo respecto da venda das instalacións de Alcoa en San Cibrao.
A Sepi (sociedade estatal de participacións industriais), segundo recalcou, "vai seguir axudando e pivotando neste proceso de venda". "Non podemos perder o obxectivo principal que todos temos que é manter eses postos de traballo. Aquí a que ten a responsabilidade directa é a empresa", subliñou.
O delegado do Goberno defendeu que "durante todo este tempo o Ministerio de Industria estivo ao seu lado", ao dos traballadores e ha apelado a seguir "traballando e deixando traballar", pois "sobre a mesa, cun esforzo enorme, está esa nova convocatoria de ofertas de seis empresas interesadas". Ademais, insistiu en que a multinacional debe ver o que pasou na Coruña e Avilés, onde recibiu unha sentenza condenatoria da Audiencia Nacional por un conflito colectivo que impulsaron os sindicatos.
"Sabe que esa non pode ser a solución para Alcoa San Cibrao", terminou José Miñones.
