O presidente do comité de empresa de Alcoa en Cervo, Xosé Paleo
"Contestounos que si, pero aínda non nos puxo data", sinalou Paleo.
"Nós tiñamos pensado que viñese en agosto, pero supoño que será máis tarde", apuntou.
Desde o comité de empresa consideran que Maroto "ten que vir aquí para comprobar o que é esta fábrica, que é un auténtico monstro".
"Temos unha fábrica viable e máis eficiente que as plantas da Coruña e Avilés, ademais do maior significado económico que ten para a contorna", subliñou Paleo.
"Se para Alcoa en A Mariña, é a morte de toda unha comarca", sentenciou.
Paleo apuntou así mesmo que este luns pola tarde ordenouse parar a primeira das 32 cubas do departamento de Electrolisis que anunciara a dirección da empresa.
"En principio pararase unha por día, e empezarase polas que hai que reconstruír", indicou.
Paleo explicou que estas cubas teñen uns "nove anos de vida útil", tras os que é preciso "demolelas, volver refacelas e arrincalas de novo".
En total, estas cubas "enfermas" son "catro ou cinco das 32", precisou.
"Tecnicamente están a buscar o mellor xeito de realizar o proceso; esta semana están a parar unha por día, e as próximas semanas pararán unhas dúas por día, polo que se todo segue segundo o previsto, estarán paradas en setembro", lamentou Paleo.
Neste sentido, o presidente do comité de empresa en San Cibrao recordou que este mércores "a media mañá" terán unha reunión con Álvaro Dorado, o presidente de Alcoa España, co obxectivo de "frear este proceso".
"Que espere, polo menos, ata o 23 de setembro para ver se se conforma un Goberno e se dá unha solución ao estatuto das electrointensivas", indicou Paleo.
"Teño a esperanza, non a confianza, de que se poida chegar a algún tipo de acordo, porque se temos o estatuto das electrointensivas, a planta de San Cibrao ten viabilidade", augurou.
Paleo tamén criticou que "as argumentacións económicas da empresa son as que ten que dar, pero desde o punto de vista sindical non é unha boa mensaxe o que se está dando".
"Seguimos o mesmo camiño que A Coruña e Avilés, e está aí o perigo dunha redución de emprego", advertiu.
Aínda así, Paleo mostrouse cauto ao afirmar que "non podemos pór o carro diante dos bois".
"Están a darse os pasos previstos e xa veremos como se suceden os acontecementos", indicou.
O presidente do comité de Alcoa en San Cibrao tamén quixo responder o delegado da Xunta en Lugo, José Manuel Balseiro, que nas últimas horas manifestara a súa "preocupación" por posibles "despedimentos" na factoría mariñá.
"Bastante máis preocupados que el estamos nós", sinalou Paleo.
