A combinación de alerta laranxa por mar de fondo do noroeste con ondas de ata seis metros de altura e situación de mareas vivas provocou que o mar fixese das súas de novo no paseo marítimo de Covas, desprotexido dende hai unhas semanas despois de que anteriores temporais levasen a area trasvasada dende o outro lado da praia, uns 30.000 metros cúbicos.
Xa momentos antes do punto álxido da preamar da tarde as ondas petaban contra o muro do paseo e superábano ata asolagalo na zona máis conflitiva. A alerta laranxa estivo activada ata a medianoite e o aviso baixou despois a amarelo, no que se manterá ata as tres da tarde deste venres por probabilidade de ondas de catro a cinco metros de altura.
En terra este xoves a situación non foi moito mellor, marcada por unha baixada brusca dos termómetros que fixo que a neve asomase nos cumios máis altos da comarca, como O Cadramón,
A temperatura mínima rexistrada onte nas estacións de Meteogalicia estivo na Pontenova, con 1,8 graos, e no Penedo do Galo en Viveiro, con 2,2, o mesmo lugar no que se rexistrou a temperatura máxima máis baixa, de 6,1 graos. As máximas foron moi cativas en toda a comarca e só a estación ribadense de Pedro Murias superou os dez graos, con 10,3.
As precipitacións tamén estiveron moi presentes e tiveron forma de fortes saraibadas en municipios coma o de Viveiro, onde mesmo houbo algún corte intermitente de luz.