A asociación de produtores de madeira de Ribadeo (Promarriba) viu modificada a súa xunta directiva nos últimos días. O empresario ribadense Marcos Villamil é o seu novo presidente en substitución de Anxo Martínez, quen ocupou o cargo desde a constitución do colectivo hai xa unha década.
Villamil toma as rendas de Promarriba nun momento especialmente propicio dados os prezos que adquiriu a madeira, principalmente de eucalipto, nos últimos meses.
"Agora mesmo pagan a pouco máis de 41 euros a tonelada se os troncos van sen cortiza", explica Villamil, quen na actualidade encabeza unha negociación coa empresa papeleira Ence na que solicitan un incremento no prezo de venda da madeira. "Ence non está polo labor de pagar máis e a cambio ofrécenos outra serie de variables no contrato que temos con eles. Buscan outras bonificacións no noso contrato pero sen tocar o prezo da madeira", afirma.
Promarriba aúna os esforzos de máis de 90 promotores do sector madeireiro. Unha cifra que previsiblemente se verá reducida durante a próxima campaña posto que "é normal que ata a próxima curta, que podería ser dentro de 15 ou 20 anos, se produzan baixas", comenta Marcos Villamil.
Os principais alicerces que sustentan este novo proxecto encabezado polo empresario ribadense baséanse en conseguir "o máximo prezo para a madeira dos nosos socios, a sustentabilidade do monte e lograr o maior número de socios posibles".
As plantacións de eucaliptos sempre estiveron no punto de mira. A súa lenda negra parece que traspasou fronteiras, e polo momento, só Asturias prohibiu o cultivo da variedade nitens polo seu maior consumo de recursos naturais. "Actualmente, en Galicia cada produtor é libre de plantar a variedade de eucalipto que mellor lle conveña. Pero se é certo que Ence prefire a variedade globulus, porque lle saca máis beneficio", conclúe Marcos Villamil.
OS ABELLEIROS. As avespas asiáticas son unha especie invasora que colonizou moitos dos recunchos da Mariña lucense e a morte dun viveirense o pasado domingo por varias picaduras de velutina reabriu a caixa de Pandora. Marcos Villamil tamén é un dos dirixentes da asociación cultural apícola Os Abelleiros: "Desgraciadamente é a crónica dunha morte anunciada. O presidente da Xunta comprometeuse nesta lexislatura a rematar cunha especie invasora como é a velutina. Agora a xente que vai arranxar as súas leiras encóntrase con esta avespa, sen remedio", di o ribadense, á vez que critica que "a Administración non pon medidas de control coa velutina".
"Nós sós acabamos este ano con máis de 50 niños primarios e capturamos máis de 4.000 raíñas", afirma o directivo dos Abelleiros, con todo os recursos da asociación son limitados. "Seguimos co trampeo, xunto con produtores de froita, aos que tamén prexudican as velutinas. As avespas volven ás zonas que xa limpamos con anterioridade e así é imposible acabar con este problema", lamenta Marcos Villamil.
