Bebo colleu a tixola polo mango e aceptou a proposta do CD Foz para adestrar ao primeiro equipo na Preferente. Un home da casa, que regresa ao mesmo banco tras un lustro afastado del, pero que non dubidou en aceptar a oferta. "Pódeme a paixón polo meu pobo, polo club que levas dentro do corazón", di.
Porque Eusebio Moreda Pérez, Bebo, que naceu en Bilbao, foise a Vigo con 3 anos e chegou a Foz con 5, xa dirixiu ao equipo focense cando estaba
E antes diso, tivo a súa carreira como xogador, aínda que se retirou pronto, con 30 anos. Probou na canteira de Athletic de Bilbao, en Lezama, e estivo cedido no Sestao, pero aguantou pouco fose de casa. "Fíxoseme moi grande aquilo con 15 anos; estaba lonxe de casa e non aguantei psicoloxicamente", recorda. Xogou case toda a súa carreira en Terceira, desde o Mindoniense ata o propio Foz, pasando polo Xove Lago, o Coruxo e o Meirás, en Ferrol, mentres facía o servizo militar.
"Vai ser difícil polas nosas limitacións pero temos un reto importante"
Aterra de novo no equipo do seu pobo co obxectivo de "axudar o máximo posible a manter a categoría, que vai estar moi difícil porque é un formato moi esixente, porque temos moitas limitacións, pero é un reto importante", comenta o estratego vasco.
EN CONSTRUCCIÓN. ¿Que equipo vai formar Bebo para esta nova tempada en Preferente? é claro e sincero: "Non o sei nin eu". "Atopeime un equipo feito con xente dos arredores, xente moi válida que me gustaría que continuase, pero agora os equipos de Primeira Autonómica empezan e non se se eses xogadores van volver ao Burela, Xove, Mondoñedo....", advirte, e fala de que a categoría é moi esixente. "Require moito sacrificio por parte dos xogadores, e moitos deles vanse a estudar fóra, e estou a expensas de ver con quen podo contar", sinala.
O empresario focego intenta imprimir carácter aos seus equipos e valora moito a persoa. "Primeiro é a persoa e logo o xogador", di. "Sobre todo intento inculcar valores, despois xa pasamos ao xogador, ao xogo, busco mellorar ao futbolista", di, e engade: "Ao xogador voulle a esixir todo e máis e é o único xeito de que logo pense que contigo aprendeu cousas e mellorou".
"En xeral valórase máis o de fóra, pero vou ser honrado, humilde e traballador e darei o mellor de min"
Bebo foi o elixido pola directiva que preside José María García Rivera entre varios candidatos, e sabe o difícil que é triunfar en casa, ser profeta na súa terra. "En xeral téndese a valorar máis o descoñecido ao de casa, critícanche máis, pero eu vou ser honrado, humilde e traballador e dar o mellor de min", sinala. "A afección, a directiva, todos temos que tirar do carro para que a tempada salga o mellor posible", recalca.
SAíDA DE VIVEIRO. A súa saída de Viveiro non foi fácil, porque foron "tres anos marabillosos", recoñece. "Lévoo no corazón", subliña. "Apostou por nós nunha situación moi complicada e grazas á afección, a directiva e os mozos, que tiraron do carro tres anos, os obxectivos cumprímolos con fartura", comenta. "Chusky portouse comigo de marabilla, Oki e Manu forman parte de min e teño que agradecer todo o que me axudaron", conclúe o técnico focego.
