O alcalde de Foz, Fran Cajoto, anunciou onte que a partir deste martes haberá un radar móbil que controlará a velocidade no centro urbano. "É necesario concienciar a tódolos veciños e visitantes de que hai que respectar os límites de velocidade e as indicacións de Policía Local e Garda Civil, especialmente en datas de gran aglomeración de xente como son vos meses de xullo e agosto", asegurou e recalcou que a medida "non é en ningún caso recadatoria senón para mellorar a seguridade e por iso anunciamos ou inicio desta campaña".
Segundo explicou Cajoto, o radar estará oculto e moverase por todo o centro urbano, priorizando as zonas con máis perigo para a circulación, e estará operativo ao longo de varios días. Ademais modificaranse os horarios nos que estará operativo. Por todo iso, o alcalde incidiu na precaución que deben ter os condutores para evitar ser sancionados.
Estes meses, a circulación no centro urbano intensifícase considerablemente polo aumento de poboación coa chegada de turistas que escollen a localidade para pasar os seus días de vacacións. As rúas do centro, así como as inmediacións da praia da Rapadoira ou a zona portuaria son algúns dos puntos onde máis se nota este incremento.
