Os accidentes debidos á agresividade dos condutores supoñen unha porcentaxe mínima na costa lucense e o Occidente de Asturias, como sinalaron os responsables de Tráfico de ambas as zonas, tanto do destacamento de Burela, como do de Luarca. Con todo, na Mariña o que si desespera aos condutores é o mal estado de determinados viarios, sobre todo da estrada que atravesa a cost, entre Barreiros e Viveiro. As fochancas profundas e a falta de zonas para o adiantamento, a pesar da densidade do tráfico pesado, exasperan ao que vai ao volante, ocasionando manobras arriscadas.
"Desde Ribadeo a Viveiro todo o tramo é moi estresante polo mal estado da vía", é o que coinciden en sinalar condutores e axentes consultados por este xornal. Outros, como o taxista Antonio Valea, especifican que o peor tramo é quizais o que discorre entre as localidades barreirense e burelense e máis concretamente pola mañá temperán "cando todo ou mundo sae tarde para traballar e logo fai burradas, como adiantar en liña continua" -exceder a raia longitudinal supón cen euros de multa, aínda que non se detraigan puntos-.
Outros sitúan o peor tramo da costa entre Fazouro e Nois.
Os propios axentes de Tráfico ven lamentable o estado que presenta a N-642 na costa lucense. A parálise da vía de alta capacidade entre Barreiros e Viveiro demostra tamén para os usuarios que a Administración está a deixar A Mariña illada ou sen comunicacións adecuadas.
"Algúns choraban, outros se mostraban moi preocupados e é que cen euros en moitos casos xa é diñeiro"
Aos peches frecuentes polas néboas no Alto do Fiouco da Autovía do Cantábrico (A-8) tampouco lles ven solución. En xeral, é un motivo de enfado para os usuarios consultados, que insisten en que se trata dunha obra mal feita, que todos pagamos e que obriga a desviarse por unha estrada nacional obsoleta e en mal estado", argumentan.
Un estudo elaborado pola Fundación Liña Directa e presentado o pasado luns afirma que tres millóns de automobilistas recoñecen en España ser altamente agresivos ao volante. Máis de 100.000, admiten ser os culpables directos de accidentes de tráfico causados por adiantar intimidando a outro condutor, por circular en zig zag ou acosar a outro na estrada.
"Non se se é agresividade, pero o que si percibo moitas veces no meu traballo diario son manobras aloucadas, como cando un vehículo fai unha incorporación á vía, creando unha situación perigosa e a 300 metros fai un xiro á esquerda. A un vehículo pesado faille parar totalmente", sinala o camioneiro mariñán Santiago Gruñeiro.
Outra manobra coa que se topa habitualmente este camioneiro ocorre despois de que o camión sinalice un adiantamento e un coche que vén lonxe acelera e empeza a darlle as luces. Pero, o que algúns non saben é que "un transporte pesado ten un limitador de velocidade de 90 quilómetros por hora. Cando adianta a outro que vai a 80, na metade do adiantamento o camioneiro acelera e ten que esquecerse porque xa se pon a 110 o vehículo".
CARREIRAS ILEGAIS. Na Mariña lucense, por exemplo, o sarxento do destacamento de Burela do subsector de Tráfico de Lugo, Íñigo Rouco, asegura que "nin de lonxe hai as conducións temerarias de outrora". Bo exemplo son os dous anos sen carné, a multa de 1.200 euros e os 60 días de traballos sociais que lle foron impostos en 2009 a un condutor novel que foi identificado tras circular a 217 km/k na A-8, en Vilalba. Tamén se recorda a identificación en 2004 de catro mozos que participaron nunha carreira clandestina en Burela, circulando pola variante a 170 por hora, ao redor das nove da noite dun mes dun xuño, por unha competición. A patrulla perseguiunos, non logrou alcanzalos pero si puido identificarlles.
Os axentes de Tráfico recoñecen que pode haber algún "pique" entre condutores, pero en estradas secundarias da rede mariñá.
SINISTRALIDADE. Os labores preventivos e de presenza policial, e a entrada en vigor do carné por puntos, reduciron notablemente a sinistralidade. "Os condutores concienciáronse ou teñen medo a unha denuncia e a perder o permiso", considera Rouco.
"Os accidentes, principalmente colisións e saídas de vía, reducíronse moito e a maioría das intervencións débense a atropelos de animais", matiza.
En definitiva, Rouco engade que periodicamente se piden melloras ou reparacións nos viarios da Mariña" e concretamente na N-642 "faise un gran esforzo diario para que non haxa accidentes, sendo especialmente vulnerables os ciclistas", considera.
ANÉCDOTAS. No Occidente de Asturias a situación é similar á da Mariña. Quizais incluso máis tranquila. Gardas da zona recordan anécdotas como a dun condutor ao que pararon hai uns anos por non levar as luces acendidas nun túnel. quedaron atónitos ao ver como se tiraba ao chan simulando estar enfermo.
O responsable de Tráfico do destacamento de Luarca, Martín Garretas, e algúns dos seus compañeiros recoñecen que cando empezou a crise económica notouse máis desesperación, -non agresividade-, entre os condutores multados. "Algúns choraban, outros se mostraban moi preocupados e é que cen euros en moitos casos xa é diñeiro", entenden.
Garretas sinala que a maioría dos accidentes débense a descoidos e excesos de velocidade; "a agresividade ten unha baixa incidencia na nosa demarcación".
En definitiva, son poucos quen están dispostos a baixarse do vehículo para agredir a outro.
