Un lume, que se iniciou ao redor da unha desta tarde, destruíu un alpendre situado xunto a unha vivenda na zona de Baralla, na parroquia vivariense de Galdo.
O lume propagouse con rapidez pola presenza no interior do local de diversos apeiros de labranza, ademais dun cortacésped e varios feixes de herba seca, pero a rápida intervención dos servizos de urxencias evitou a propagación das chamas e que se producisen danos persoais.
En menos dunha hora o lume quedou extinguido, aínda que os bombeiros continuaron arrefriando a zona. Ademais destes efectivos, con base en Viveiro, sumáronse aos labores de extinción Policía Local, Policía Nacional e Protección Civil.