O delegado do Goberno en Galicia, Javier Losada, valorou este martes o traballo "moi importante" da ministra de Industria, Reyes Maroto, e do secretario xeral de Industria, Raúl Blanco, nas negociacións polo mantemento de Alcoa, grazas aos que "hoxe podemos falar de futuro".
Así o manifestou en declaracións aos medios de comunicación nunha visita á sede da Real Academia Galega, onde tamén apuntou que espera que na reunión deste martes se avance coa consecución do que sempre quixo o Goberno, o mantemento do "traballo e a actividade industrial".
"Eu creo que foi un bo traballo e quero agradecerlle aos sindicatos e ao comité de empresa as súas achegas porque o obxectivo é o mesmo, o traballo e o tecido industrial en Galicia", aseverou Losada.
Tamén subliñou a importancia dos "temas de transición ecolóxica" e das "subvencións do CO2" que "o novo estatuto porá para o custo da enerxía".
Os sindicatos de Alcoa reuniranse este martes con representantes do fondo suízo Parter Capital, o investidor interesado en adquirir á multinacional do aluminio as factorías da Coruña e Avilés (Asturias), para que lles expoña o seu proxecto industrial, un encontro ao que asistirán representantes do Ministerio de Industria.
