Os ataques do lobo continúan sucedéndose en diferentes puntos da comarca mariñá, aínda que nas últimas semanas máis centrados na zona occidental. Nesta ocasión tocoulle sufrilo a unha explotación situada en A Rigueira, no municipio de Xove. Trátase dunha granxa denominada A Lamela e o seu dono viu como o lobo matou na noite do luns ao martes a un total de catro animais.
Non foron os únicos estragos que causou, xa que outras seis ou sete ovellas quedaron feridas e o dono dos animais, Fernando García, dá por feito que estas ovellas van falecer tamén e incluso cre que algunha máis non sairá adiante porque todas quedaron moi afectadas e agora acusan a tensión do ataque. Trátase dunha situación típica nestes animais tras un ataque de lobos.
García utiliza a súa explotación ovina da Lamela para consumo propio e para que os animais manteñan a súa leira en bo estado. Lamentábase o martes do sucedido porque dá por feito que non poderá seguir producindo nin traballando cos animais porque non existen compensacións ben planificadas para este tipo de situacións.
Xusto mentres esperaba a visita do veterinario comentaba que "apenas che dan axudas para cando che pasa isto". "Os lobos agora están totalmente protexidos e resulta que os que quedamos desprotexidos somos os gandeiros e o lobo ben se ve que está indo cada vez máis cerca das casas. Aínda hai pouco tempo que se meteu ata Celeiro, entre as casas, e agora polo que se ve están achegándose máis cara esta zona, e tocoume a min", afirmaba.
SUBVENCIÓNS. Polo momento non ten claro canto lle vai a abonar a Administración polos seus animais "pero será unha cantidade moi pequena que nunca che cubre o que valen en realidade e tampouco serve para que poidas volver a montar a gandería como a tiñas. Eso xa o dou por feito, porque ademais o que che pagan acabas cobrándoo dentro de ano e medio máis ou menos, e iso se ao final cobras, que xa veremos".
No seu caso recorda que o anterior ataque nesta zona foi haberá uns nove anos, pero cada vez se atreven máis. "Eu véxoos desde a ventá da miña habitación. Chegan ata aquí, e agora as ovellas colleron medo e están moi afectadas".
Fernando García comentaba que precisamente o martes os animais xa non querían entrar no cortello que utilizan habitualmente e resultáballe imposible que se recollesen alí.
O gandeiro apunta que "seguramente na parte alta o lobo xa non ten tanto que comer e por iso baixan ata aquí, pero habería que solucionar esto porque no meu caso había algunhas ovellas que estaban preñadas que non sei se me van a ter en conta. Está todo pensado para o lobo".
FUTURO. Aínda que a súa explotación tiña 26 animais non ten claro que siga en funcionamento polo estado das ovellas "porque todas colleron moito medo". Ademais nin queren ir á corte nin estar polo prado, que é onde terían que estar nesta época do ano. "A ver se nos dan algunha solución", di.