O alcalde de Burela e a alcaldesa de Moeche, como integrantes da comisión en defensa do Feve, acordaron solicitar unha reunión con Renfe, Adif e a Xunta coa fin de abordar o estado actual do servizo do tren, minguado coa crise do coronavirus, pero que entenden debería recuperarse e mellorar. Un encontro no que propoñen a presenza de todos os alcaldes da zona de A Mariña, Ferrolterra e Ortegal.
As tres comarcas estaban representadas nunha comisión en defensa do ferrocarril o entender que se trata de algo vital para reforzar o norte de Galicia. "Contar cun servizo público destas características é importantísimo para procurar unha comarca con todas as vantaxes socioeconómicas e para que a xente se vexa con confianza", conta sobre a proposta da Mariña de contar cun servizo regular de proximidade Viveiro-Ribadeo e Ribadeo-Viveiro.
É de vital importancia recuperar o servizo que había antes da pandemia.
Un servizo que Llano insiste en reclamar e que é similar ao que defendía no norte coruñés, desde Ortegal a Ferrol. "Imos volver retomar isto", asevera o alcalde burelense, que fai ademais un chamamento para que se vaia recuperando o servizo que había antes do inicio da pandemia. "Minimizouse por este motivo, pero agora xa se tiña que estar a recuperar e non haber unicamente un tren, senón que os que se precisen".
COMPROMISOS. Unha situación que dista moito de ser unha realidade, segundo Llano, quen considera que "hoxe todo o servizo de Feve está pedindo axuda e berrando que se lle faga caso porque realmente está a deteriorarse dunha maneira impresionante" e reclama que se cumpran os compromisos fixados no principio do ano. "Naquelas reunións chegamos a un compromiso tanto para A Mariña como para Ferrolterra e Ortegal de contar con servizos de tren, de atención ás estacións e de obras pero non se está a cumprir absolutamente nada", lamenta.
"Non só hai que pensar en recuperalo senón que hai que melloralo. Hai que facer moita obra, mantementos, novos investimentos e ter novos trens. Todo isto hai que reclamalo con contundencia e decisión vendo que ten que haber nos orzamentos cartos para atender a isto", esixe o rexedor burelense, quen cre que "na Mariña non podemos admitir que todo estea en decadencia senón que hai que procurar darlle para arriba a todas estas actuacións porque son fundamentais para un desenvolvemento integral da nosa comarca tanto non aspecto social como non económico".
"É preocupante que exista esta deterioración, froito da pouca atención a un servizo público", di Alfredo Llano.