O ansiado acondicionamento das estradas provinciais en Xove terá que esperar, atendendo ao rexeitamento do bipartito provincial que conforman PSOE e BNG, ao protocolo asinado en 2018 polo alcalde e o anterior presidente da Deputación, Darío Campos. No entanto, o alcalde, Demetrio Salgueiro, non se resigna ao "sorpresivo voto en contra".
¿Existe un compromiso de arranxo das vías provinciais en Xove?
Hai vontade, compromiso, pero non obriga, segundo os socialistas, que acusan ao PP de atribuír á Deputación un suposto incumprimento do protocolo subscrito, porque este non "recolle obrigas, senón unha declaración de intencións", defendeu a deputada María Loureiro, que engadiu que os obxectivos deben concretarse en convenios.
En cambio, os populares aseguran que houbo falta de respecto do goberno provincial polos compromisos adquiridos pola Deputación para a reparación de dez vías no concello de Xove", sinala o portavoz do PP, Javier Castiñeira, crispado porque a nacionalista Mónica Freire dixese que ese acordo "non é nada", en resposta á moción defendida polo popular Jesús Novo.
O Goberno provincial defende que un protocolo é só unha declaración de intencións e que a pesar diso traballou para a súa mellora
¿Que recollía o protocolo?
A Deputación redactaría os proxectos das dez vías e executaría obras en dúas, a que conecta co Portiño de Morás, actualmente en execución parcial, e a que une Monte con Valcarría, en Viveiro. Unha vez realizadas as obras, as estradas pasarían a titularidade municipal e o Concello ocuparíase do seu mantemento.
¿Que reaccións suscita na oposición o acordo en Xove?
O BNG de Xove oponse a que as vías pasen ao Concello ao entender que sería "unha hipoteca vitalicia. Levamos demasiados anos padecendo a súa pésima xestión e agora pretenden facer o peor negocio posible", ademais de reprochar ao rexedor que non fixese nada antes para lograr o arranxo das vías, di Carlos Fernández Louzao.
Pola súa banda, o alcalde tacha de "vergoñoso" o rexeitamento de ambos os partidos. Censura que o Bloque xovense "mire máis polo interese político que polo dos veciños" e recorda que segundo o acordo o Concello pagaría máis do 60% das reparacións. Demetrio Salgueiro tamén carga contra María Loureiro pola "súa irresponsabilidade", dado que xa era deputada cando se acordou o protocolo e a Deputación aglomerou case todas as vías do municipio de Viveiro. Ademais, recorda que a lei obriga ao organismo provincial a ter en bo estado as vías da súa titularidade e considera incrible o non do BNG local á principal demanda dos veciños de Xove.
O BNG xovense oponse á cesión de vías ao Concello por hipoteca "vitalicia" e o rexedor apela á obriga legal e a demanda veciñal
¿Que fixo a Deputación desde a firma?
A deputada vivariense María Loureiro asegura que o organismo traballou para mellorar as estradas xovenses. Explica que as LU-P-2609 e 2610 xa teñen firme MBC, traballan entre os quilómetros 0,400 e 2,850 da LU-P-2601, que ten redactado o proxecto da segunda fase; igual que están redactados os das vías denominadas LU-P-2605, 2606, 2607, 6606 e 2602. Apunta ademais que a LU-P-2603 é unha vía urbana, con firme en lastro e que a LU-P-2604 é a única con traballo pendente.
Loureiro tamén nega que a Deputación reciba do Concello xovense máis do que inviste nel. Ingresou 370.000 euros ao ente provincial en 2019 fronte a 579.000 euros achegados —470.000 destinados a infraestruturas-. "Este Goberno impulsa o principio de solidariedade territorial, buscando o equilibrio nos servizos públicos e as infraestruturas en todos os concellos da provincia, sexan da cor política que sexa", asegura.
¿Que hai de fondo tras a polémica?
Castiñeira, o portavoz popular, fala de quebra institucional, pero tamén cre que PSOE e BNG perciben un mal horizonte político en Galicia e iso inflúe no rexeitamento a todas as propostas do PP no último pleno: Alcoa, plan Poscovid e ao acordo con Xove.
