A asociación animalista Libera reclama pasos de fauna para animais salvaxes co fin de que se facilite o tránsito dos mesmos por zonas próximas ás estradas sen necesidade de que as invadan e para que se poidan evitar así accidentes como o rexistrado a pasada fin de semana en Cervo coa morte dun lobo atropelado na N-642.
A entidade aposta por túneles ou pontes para que os animais poidan cruzar as vías sen perigo, á vez que se conciencia aos condutores sobre a convivencia do asfalto cos hábitats naturais nos que residen estes animais e onde se construíron estradas, que os animais cruzan, o que supón un perigo para a súa integridade e para as das persoas que circulan nos seus vehículos.
Unha proposta que Libera xa trasladou á Xunta de Galicia, polo que supón na comunidade con lobos e xabarís maioritariamente, aínda que recoñece que a resposta que tiveron das autoridades galegas contou con escaso "éxito" e iso, din, a pesar de que son medidas que se implantaron con éxito en diversos países europeos.
REFERENCIAS. Os defensores dos animais citan aos Países Baixos, "onde existen centos de pasos neutralizados que evitan miles de accidentes", pero tamén Noruega, Suíza ou Luxemburgo, "onde trataron de implementar accións para evitar colisións con animais, especialmente xabarís e cervos, que polo seu tamaño poden chegar a causar maiores danos materiais e humanos", explican desde o colectivo, desde o que advirten que tamén en Polonia aumentaron os sinistros.
Á creación de pasos específicos para animais de diferente tamaño Libera suma a proposta de deseñar cintos de vexetación nas propias estradas, que sirvan como pantalla para os animais.
