Dúas mozas resultaron feridas de diversa consideración ao ser atropeladas por un autobús escolar na rúa Martín Ledesma de Viveiro, á altura dos institutos. O accidente ocorreu pasadas as tres e media da tarde deste luns.
O 112 mobilizou aos Bombeiros de Viveiro, a Garda Civil, Policía Local, Protección Civil e Urxencias Médicas, que desprazou dúas ambulancias, unha básica asistencial e outra medicalizada.
As mozas foron trasladadas ao Hospital da Mariña, en Burela. Unha presentaba un golpe, mentres que a outra tiña un pé danado que quedou aprisionado baixo a roda do vehículo. As dúas estaban conscientes.