Día de praia e bebida fría en Lavandeiras para meterse de cabeza nun Resurrection Fest, que segue enchendo acampadas. Os últimos en chegar optan incluso por sebes, aínda que sexa xunto á depuradora. Moitos asiduos marcáronse un ano máis viaxes de ata 16 horas para estar nun festival do que valoran o bo clima, o ambiente e os veciños de tenda para verse de novo.
Tras o gran son de Ministry na noite do mércores que apuntaba choiva e quedou nun chispeo, polos catro escenarios pasaron na tarde deste xoves, baixo o sol, bandas como Cuchillo de Fuego, Against de Waves ou Agoraphobia. Os mellores da xornada, de momento, Jinjer, coa súa cantante enchendo o escenario grande.