O que era un segredo a voces confirmouse este luns. Jesús Gayol seguirá á fronte do primeiro equipo do Club Deportivo Foz para a próxima tempada. O adestrador cumprirá así a súa cuarta tempada no banco branquivermello, que colleu cando o equipo estaba en Segunda Autonómica e o próximo ano xogará en Preferente.
Gayol é un dos artífices das boas campañas que leva facendo o Foz nos últimos anos. Un técnico con moita experiencia que ten como punto forte que sabe espremer e sacar os mellor de cada persoal. Coa súa renovación, o Foz non cambia de rumbo e deixa como está algo que funcionou ben.
Este é o primeiro paso para o novo proxecto do Foz en Preferente. A próxima semana, segundo o presidente, José María García Rivera, comezarán as reunións cos xogadores do persoal, "un a un", para coñecer as súas expectativas de face á tempada próxima.
De xeito paralelo, desde o club queren impulsar unha campaña de captación de socios para tratar de incrementar a masa social, xa que os gastos tamén se incrementarán na nova categoría.