domingo. 15.12.2019 |
El tiempo
domingo. 15.12.2019
El tiempo

Javi Chinchón: "Capeo mellor un cliente pesado que un bo dianteiro"

Javi Chinchón, no Muelle Bar, sempre preto do balón. J.Mª.ÁLVEZ
Javi Chinchón, no Muelle Bar, sempre preto do balón. J.Mª.ÁLVEZ

Leva case toda a súa vida entre o fútbol e a hostalaría. Agora deixou o primeiro despois de 22 anos

O Muelle Bar é o espazo onde Javi Chinchón pasa cada día do verán unha morea de horas, cambiando a camisola do CD Foz polo mandilón e o abridor. Este é un verán especial porque deixou de xogar ao fútbol despois de 22 anos, con principio e peche no Foz e paso polo Lugo xuvenil, San Ciprián, Burela, Viveiro, Cervo e Lourenzá.

É para vostede o Muelle Bar máis que un negocio de hostalaría?
Pois o certo é que si. É verdade que dá traballo e que nos dous meses do verán estou moi liado, pero gústame esta actividade. Ver que funciona ben, que case sempre hai moita xente e que os clientes están satisfeitos supón unha enorme felicidade.

Sempre se lle ve de bo humor detrás da barra, como o consegue?
Teño días malos, coma todo o mundo, pero trato de que sexan os menos posibles e que tampouco se me note demasiado, pero ás veces cústame (risas).

Aféctanlle os problemas que existen para atopar xente para traballar na hostalaría?
Afectou tanto que deixei de levar a cabo algunha iniciativa precisamente pola falta de xente, creo que é un problema xeralizado en bastantes sectores.

Aínda así mantén os Xoves Cálidos, unha iniciativa que o ‘peta’ cada verán.
A verdade é que ter tanto éxito foi algo que nos sorprendeu un pouco. Vén xente de toda A Mariña, non só de Foz, e parece que estamos na boa onda, como din os surfistas. Considero que hai que aproveitala, porque logo cambian as cousas.

A aposta polos Xoves Cálidos foi algo que me gustaría como cliente e estamos na boa onda, como diría un surfeiro

Como se lle ocorreu a idea?
Pois pensei que a música ao aire libre é uhha das cousas que máis me gustan como cliente e parece que hai moita xente que opina algo semellante. Vexo que lle dá moita importancia á música. Dende logo. De feito, os domingos sempre temos polas 9 da noite unha actuación en directo para pechar a fin de semana.

Deixemos o bar, ou relacionémolo co fútbol. Despois de 22 anos xogando por toda A Mariña, virán moitos amigos polo Muelle Bar dos equipos polos que pasou.
Pois a verdade é que si. Máis que recordos do fútbol, o que me quedan son moitos amigos e por aquí pasan ben deles. A xente que un vai coñecendo no fútbol é co que hai que quedarse. Podo dicir que en tódolos sitios nos que xoguei deixei amigos e iso é algo que me enche de ledicia.

Empezou e acabou no Foz. Foi algo premeditado o de pechar a súa carreira no Martínez Otero?
Si, era algo que tiña claro. Despois de estar no Lourenzá, que foi a miña segunda casa, tardei un pouco en volver ao Foz. Tíñao pactado con Gayol, pero había un directivo co que non conxeniaba, pero en canto puiden voltei.

E tiña claro que o ía deixar este ano?
Xa pensaba deixalo o pasado, pero despois do ascenso había un ambiente fabuloso e decidín xogar unha tempada máis. Desta volta si que o tiña asumido.

Que leva mellor, aguantar a un cliente pesado ou frear un dianteiro de calidade?
Pois hai anos ao mellor contestaba outra cousa, pero agora, coa miña idade penso que capeo mellor un cliente pesado.

Javi Chinchón: "Capeo mellor un cliente pesado que un bo dianteiro"
Comentarios