A Garda Civil imputa en calidade de investigados a catro persoas por supostos delitos contra a seguridade viaria, debido a que deron positivos nas probas de alcoholemia que lles practicaron cando conducían por estradas da comarca mariñá.
Un veciño de Viveiro, de 40 anos, quen conducía con taxa de alcol en sangue superior á legalmente establecida e baixo os efectos de drogas tóxicas, é obxecto de investigación ao arroxar os seguintes datos nunha análise efectuada polo Sergas: 1,86 gramos de etanol por litro de aire expirado, 2,9 nanogramo por mililitro de cocaína e 8,1 nanogramos por litro de morfina.
Os gardas comprobaron estes feitos tras un accidente de circulación consistente nunha saída de vía do condutor dunha motocicleta que impactou contra un turismo estacionado nunha estrada do municipio vivariense.
Tamén investigan a un veciño de Meira, de 30 anos, foi detectado no quilómetro 38,700 da estrada N-640, ao seu paso pola Pontenova, onde os axentes efectuaban un control co etilómetro de aproximación, arroxando esta persoa un resultado de 1,16 milígramos de alcol por litro de aire expirado.
Ademais, imputan a un veciño de Ribadeo, de 46 anos, que nas probas de detección alcohólica arroxou un resultado positivo de 1,06 milígramos por litro de aire expirado. A Garda Civil investiga así mesmo a outro veciño de Foz, de 42 anos, por idéntico delito tras dar un resultado positivo de 1,06 milígramos de alcol por litro de aire expirado.
Todas estas persoas foron postas a disposición da autoridade xudicial competente.
