Un condutor duns 30 anos de idade está a ser investigado tras chocar ebrio contra o muro da ponte da Misericordia, ao que accedeu desde a parte de Viveiro invadindo o carril contrario e impactando contra o muro próximo ao carril esquerdo no sentido da súa marcha. Os feitos ocorreron ás seis menos dez da mañá do sábado pasado.
A patrulla da Policía Local que estaba de servizo esa noite realizando labores de vixilancia no centro histórico detectou ao accidentado, quen deu positivo nas probas de alcoholemia que lle practicaron a raíz do sinistro. Na primeira arroxou unha taxa de 0,84 milígramos de alcol por litro de aire expirado e na segunda alcanzou os 0,89 milígramos. Ambas están por encima da cantidade establecida para ser considerada esta conduta como delituosa. Xa que logo atribúeselle un delito contra a seguridade viaria.
Os axentes tamén formularon denuncia contra este condutor porque non tiña ao día a Inspección Técnica de Vehículos (ITV), que estaba caducada.
