A Policía Local de Ribadeo inmobilizou na madrugada do sábado ao domingo pasado dous vehículos ao dar positivo en alcol os seus condutores. A actuación produciuse tras ser detectados ambos nun control que levaban a cabo axentes da Garda Civil na estrada de Vilela, aproximadamente á altura do colexio Gregorio Sanz da localidade ribadense.
A vixilancia preventiva da Benemérita deu resultado ás tres da madrugada cando parou aos condutores. Ao ser a zona de competencia municipal, avisou aos policías locais quen asumiron a tramitación dos expedientes correspondentes. Un dos condutores arroxou unha taxa de 0,54 miligramos de alcol por litro de aire expirado, por baixo dos 0,60 a partir dos que se considera delito a condución baixo a influencia de bebidas alcohólicas. O outro rexistrou 0,93 miligramos na proba que lle practicaron, polo que a dilixencia é diferente, por vía xudicial.
Os afectados optaron por esperar xunto aos vehículos, que foron inmobilizados polos axentes ao non atoparse os condutores en condicións de seguir ao volante e non avisar a outra persoa para que lles recollese. O primeiro puido marcharse ás nove e media da mañá e o outro seguía esperando ao mediodía os a que baixase a taxa. Tratábase de veciños do concello de Barreiros.
Doutra banda, os municipais de Ribadeo tamén foron alertados polos veciños das molestias que causaba o botellón que realizaba un grupo reducido de mozos na zona da Atalaia, un acto puntual, segundo os indicios. Os presentes emprenderon a fuxida con rapidez en canto detectaron a chegada dos policías. A súa marcha tamén acabou coas molestias causadas aos veciños.
