A inspección especial realizada na ponte da Misericordia de Viveiro entre finais do pasado ano e principios do actual detectou unha serie de danos a nivel superficial que os técnicos non consideran graves, pero que si cren necesaria a súa reparación para incrementar a vida útil da estrutura e mellorar o seu aspecto estético. A Consellería de Infraestruturas prevé redactar nos próximos meses un proxecto construtivo que defina e valore de forma pormenorizada as obras precisas, cuxo custo estima nuns 700.000 euros tras unha avaliación previa.
O estudo considera que o estado da ponte é adecuado desde o punto de vista estrutural, pero a nivel superficial apreciou a existencia de roturas e desprazamentos de sillares, así como de puntos nos que o morteiro está disgregado ou desprendido. O sistema de drenaxe do viaduto é tamén pouco eficiente, o que favorece a presenza de humidades, gretas e de vexetación a nivel superficial.
O estudo tamén propón melloras no sistema de drenaxe para afastar os puntos de desaugadoiro da obra de fábrica
As actuacións principais que propoñen consisten na eliminación de vexetación, a reposición dos sillares rotos ou desprazados, e o selado das xuntas de obra de fábrica, así como a reparación das fisuras e desconchados existentes no taboleiro da ponte, onde ademais consideran necesario mellorar as canalizacións de drenaxe para facilitar o desaugadoiro.
Os danos detectados a nivel superficial comprenden desde manchas de humidade orixinadas pola acción da auga na zona de carreira da marea e certas deficiencias nos sistemas de drenaxe, debido a que os tubos son curtos nalgún caso ou están fisurados; ata vexetación enraizada asociada á humidade, pasando por perda de material de cimentación nas xuntas e desprazamento ou rotura de sillares, algo que se considera lóxico ao tratarse dunha ponte medieval formado por grandes pedras irregulares propias desa época.
Ademais no taboleiro está desprendida a capa que recubre o formigón e presenta fisuras en zonas puntuais. A pintura das varandas está así mesmo deteriorada e hai deficiencias na ancoraxe dos postes de iluminación.
A proposta de actuación inclúe a retirada de vexetación, a recolocación ou substitución dos sillares desprazados e o selado das xuntas mediante morteiros adecuados. Para o taboleiro suxiren a súa limpeza, a reparación con morteiro e o selado das fisuras, ademais do acondicionamento dos farois e varandas.
En canto ao sistema de drenaxe propoñen a súa substitución con tubos de pvc para os sumidoiros e a execución de goterón nos extremos voladizos para afastar os puntos de desaugadoiro da obra de fábrica.
A inspección efectuada consistiu en ensaios in situ e en laboratorio para caracterizar os materiais extraídos en doce sondaxes realizadas no interior da ponte e 32 perfís de georradar para definjir o espesor dos sillares, cunha media de 50 centímetros.
A ponte da Misericordia, que está catalogado como histórico, forma parte da estrada autonómica LU-862, situándose nos seus quilómetros 85. Está situado sobre a ría de Viveiro e data do século XVI. Conta con dez vans e unha plataforma de once metros de lonxitude ensanchada a finais dos anos 70 para albergar dous carriis e as beirarrúas de lousa de formigón en voladizo.
