A ministra de Industria, Comercio e Turismo, Reyes Maroto, indicou este mércores na súa comparecencia no Senado, que o Fondo Español de Reserva para Garantías de Entidades Electrointensivas (Fergei) e o Estatuto de Consumidores Electrointensivos verán a luz antes de que finalice o verán. Maroto sinalou que nas próximas dúas semanas aprobarase a creación do Fergei de apoio aos contratos bilaterais de enerxía a longo prazo que subscriban esas empresas e que tanto este fondo como o estatuto —do que está por aprobar o real decreto que o desenvolverá— son "instrumentos decisivos para reducir os custos enerxéticos á produción nacional" e que esta dúas medidas "verán a luz antes da finalización do verán". Respecto ao estatuto concretou que dará un marco de certidumbre e estabilidade do prezo enerxético á industria española.
A ministra, que mostrou a súa solidariedade e a do Goberno cos traballadores e as familias de Alcoa en San Cibrao, afirmou que o Goberno segue traballando con todas as administracións e os sindicatos para manter as capacidades industriais e o emprego desta planta. Tamén criticou que a empresa non presente nos últimos tres anos un plan industrial para as fábricas. Ademais avanzou que se empeñará persoalmente no que é unha demanda da sociedade civil, que haxa consenso a longo prazo en materia de política industrial. Por iso vai impulsar un Pacto pola Industria do século XXI.
Máis concreto con respecto aos prazos para o fondo de garantías, que estará dotado con 200 millóns de euros para avalar os contratos bilaterais coñecidos como PPA, e do estatuto electrointensivo mostrouse onte o secretario de Industria, Raül Blanco, nunha entrevista na Radio Galega. Así, dixo que a próxima semana aprobaríase o fondo de garantía e a seguinte o estatuto. "Iso significa que estas medidas van estar en marcha, pero se aínda así Alcoa non quere seguir, que deixe paso e podamos buscar un plan industrial viable para San Cibrao", asegurou Blanco insistindo na idea xa lanzada o martes tras a mesa multilateral de Alcoa.
Neste sentido, Blanco puxo o exemplo da planta que a multinacional ten en Ferndale, Washington, onde a empresa está a seguir un proceso similar ao sancibrense, a pesar de contar con numerosas axudas das administracións. Segundo a prensa norteamericana, o venres pasado entregáronse as primeiras 50 cartas de despedimento nesta factoría con 700 traballadores e espérase que se alcancen as 400 as próximas dúas semanas. Blanco subliñou que esta situación demostra que o proceso en San Cibrao forma parte dunha "estratexia global" da firma para deixar de producir aluminio primario, "incluso naqueles lugares onde ten prezos beneficiosos da enerxía como Estados Unidos ou Noruega".
Con respecto ao estatuto, Blanco tamén precisou que nestes momentos están a valorarse as alegacións e que se dará resposta a cada unha delas. "Cando se aprobe, que xa está nos últimos trámites, verase claramente como vai quedar", asegurou sen dar máis detalles respecto diso.
