sábado. 23.01.2021 |
El tiempo
sábado. 23.01.2021
El tiempo

Indignación polas gravacións na Maruxaina colgadas en webs porno

Ambiente festivo na Maruxaina do ano pasado. JM PALEO (AMA)
Ambiente festivo na Maruxaina do ano pasado. JM PALEO (AMA)
Os vídeos xa foron borrados, pero as denuncias sucédense estes días e a asociación Bumei de Burela acudirase como acusación particular para que a investigación aclare o sucedido

Indignación é a palabra que mellor define a reacción deste luns na Mariña pola aparición de gravacións feitas con cámara oculta durante a festa da Maruxaina en San Cibrao e que estaban publicadas en páxinas web de contido pornográfico. Trátase de escenas nas que mulleres acoden a unha rúa discreta da localidade para facer as súas necesidades na vía pública durante os festexos do ano pasado e que foron tomadas con cámaras fixas desde distintos ángulos. Nas tomas identifícanse perfectamente os rostros das mulleres e son vídeos de bastante duración.

Desde que saltou a primeira noticia da existencia destes vídeos, que xa foron borrados, sucedéronse as denuncias de mulleres que asistiron á festa e que poden estar entre as afectadas. A pesar de que o caso o está investigando a Garda Civil porque Cervo pertence á demarcación deste corpo de seguridade do Estado, a comisaría da Policía Nacional de Viveiro está a recibir as denuncias de mozas que foron alertadas de que saían nas imaxes.

Neste sentido, desde a asociación Mulleres en Igualdade de Burela (Bumei) acordaron onte a última hora nunha reunión na que estiveron asesoradas pola súa avogada acudirse como acusación popular neste caso para o que acudirán ao longo da mañá deste martes ao cuartel da Garda Civil para presentar a correspondente denuncia. "Este tipo de comportamentos non se poden permitir", subliñou a presidenta do colectivo, Mar Fraga, que mostrou a súa indignación por unha "violación da intimidade de moitas mozas, menores entre elas, ás que se lles ocasionou un dano irreparable". "Queremos que a investigación destes feitos chegue ata os responsables e que estes paguen por iso", subliñou Fraga, que fixo unha condena "enérxica" duns feitos que "non deberían terse producido".

Ademais apelou á educación en valores e ao papel do ensino para erradicar este tipo de comportamentos na sociedade.

A este respecto tamén se pronunciou onte o alcalde de Cervo, Alfonso Villares, que fixo unha forte condena do sucedido. "Este tipo de feitos hai que rexeitalos dunha maneira absoluta e agora é tempo de atopar os responsables dos mesmos para que non queden impunes e respondan polo acontecido", subliñou.

Indignación polas gravacións na Maruxaina colgadas en webs porno