Un incendio que se produciu o venres ao redor das sete e media da tarde na residencia Betania de Viveiro saldouse unicamente con danos materiais nunha estancia do centro.
O lume orixinouse nun aparello que estaba enchufado no baño dunha das habitacións da primeira planta. Aínda que foron mobilizados os bombeiros do parque da cidade do Landro, cando chegaron as lapas xa foran extinguidas cun extintor por unha das relixiosas que atenden a residencia.
Afortunadamente a habitación estaba baleira e na planta só había nese momento dous residentes, polo que non foi necesario realizar ningún tipo de evacuación e o incendio só se saldou con danos materiais, sobre todo no propio baño, xa que ao estar a porta pechada non chegou a expandirse.
Os bombeiros revisaron que o lume estivese perfectamente apagado e procederon a ventilar a planta. Tamén interviñeron a Policía Local e membros de Protección Civil de Viveiro.
