Un incendio forestal orixinado na zona do cruzamento de Pastoriza da estrada que vai cara a Santa Cruz, na parroquia ribadense de Ove queimou ao redor dunha hectárea de monte plantada de eucalipto e piñeiro.
O lume declarouse cara ás tres da tarde deste mércores e quedou extinguido unhas tres horas despois, dado que o vento dificultou as tarefas, aínda que non requiriu o emprego de medios extraordinarios ao ser de pouca consideración e non haber casas cerca.
Tres brigadas de Medio Rural, xunto con dúas motobombas da Xunta e do Concello, ademais de dúas patrullas da Garda Civil e da Policía Local interviñeron con celeridade nos traballos necesarios para atallar o lume, cuxas causas se descoñecen e están en investigación por parte das autoridades.
A parroquia de Ove é obxectivo dos incendios de xeito periódico, aínda que estes prodúcense habitualmente na estrada que conduce cara a Vegadeo, aínda que nesta ocasión o lume desenvolveuse noutro punto, próximo a un viario da Deputación e situado detrás do monte de Santa Cruz.
