Un incendio forestal orixinado na parroquia de Suegos (O Vicedo) cara ás dúas menos cuarto da tarde deste sábado queimou uns 2.000 metros de superficie arboredo. O lume, que se produciu cara ás dúas menos cuarto da tarde, desencadeouse a partir dunha queima realizada na parte posterior do cemiterio. O home que a realizaba, con residencia en Covas, sufriu lesións ao tratar de apagar o foco e foi asistido no centro de saúde vicedense.
A Consellería de Medio Rural mobilizou a un axente, dúas brigadas e dúas motobombas, ademais acudiron a motobomba do Vicedo e a do parque comarcal dos bombeiros de Viveiro. Protección Civil do Vicedo participou nas tarefas de extinción deste conato, que quedou controlado unha hora despois do seu inicio, aínda que as tarefas de refresco seguiron ata as sete da tarde. A zona arboredo á que afectou ardeu con facilidade debido á existencia dun gran número de folgueira, que propagaron rápido o lume, que non chegou a pór en perigo vivendas.
RIOTORTO. Na localidade riotortense, os efectivos dos GES da Pontenova e os bombeiros de Barreiros acudiron ao incendio da cheminea dunha vivenda que se tupiu e non permitía unha combustión adecuada. Este tipo de incidencias son habituais no inverno cando, nas casas, tras varios meses sen limpar os condutos, se acenden as chemineas, sen estar despexadas as saídas.
