Un lume que se iniciou pasadas as nove da noite na aldea de Figueirúa, no municipio da Pontenova, calcinou por completo unha casa, que foi devorada polas chamas en apenas uns minutos, a pesar dos esforzos do GES da Pontenova, que chegaron de inmediato e que con axuda dos veciños intentaron apagar o lume con mangueiras e unha cisterna de auga. O que si lograron foi evitar que se propagasen ás casas contiguas nas que si vive xente.
Para iso, fixeron unha cadea para sufocar as chamas, ao que axudou a proximidade dunha boca de rega na zona, ata a que tamén se desprazaron os bombeiros de Barreiros, que a última hora refrescaban a zona para evitar que o lume se reavivase.
A casa, rehabilitada, pertence a unha familia que reside en Barcelona, aínda que leva tempo sen achegarse por esta segunda residencia na comarca mariñá.
