A Garda Civil imputou a un veciño do Vicedo, de 56 anos de idade, como investigado por un suposto delito de homicidio por imprudencia grave, a raíz do atropelo que lle custou a vida a unha muller de 46 anos que estaba a facer deporte nas inmediacións da praia de Arealonga, no municipio mariñán.
Logo da correspondente investigación, a Garda Civil tamén lle imputa os delitos de abandono do lugar do accidente e de omisión do deber de socorro.
O sinistro produciuse o pasado 21 de xuño, á altura do quilómetro 70.900 da estrada autonómica LU-862, nas inmediacións da praia de Arealonga, no municipio do Vicedo.
A persoa investigada foi posta a disposición do Xulgado de Instrución número 1 de Viveiro.