Iago Caamaño imponse no Rallye da Mariña tras unha gran remontada

A tregua que lle deu este sábado o mal tempo ás estradas e camiños da Mariña resultou providencial para que os afeccionados ao motor puidesen presenciar todo o seu esplendor aos mellores pilotos de rallyes de Galicia durante a última proba do campionato autonómico, que se celebrou onte en Viveiro, O Vicedo, Xove e Cervo.

Desde as 8.00 da mañá ata as 20.00 da tarde víronse escenas espectaculares cun tramo rapidísimo do Vicedo, un máis técnico, o de Xove, e un máis ‘rateiro', na xerga dos pilotos, como foi o de Cervo, cunha saída espectacular desde a fábrica de Sargadelos e un primeiro quilómetro moi vistoso para os afeccionados que se deron cita pola zona do conxunto histórico, con algunhas curvas moi rápidas.

A nivel deportivo, os favoritos cumpriron co seu papel e non houbo marxe para as sorpresas grazas á gran actuación de Alberto Meira e Iago Caamaño, que mantiveron un duelo tremendo desde o principio ata o final do Rallye. Meira dominou con claridade as primeiras pasadas, pero Caamaño comezou a recortar diferenzas e púxose con opcións de remontar.

O duelo entre ambos os pilotos foi tremendo, chegándose ao tramo final de Cervo con só 4.4 segundos a favor de Meira, que non puido aguantar co empuxe de Caamaño, que finalmente se alzou co triunfo.

O piloto da Escudería A Pontenova Óscar Veiga, aproveitou a retirada do lucense Adrián Díaz na primeira pasada de Xove para coarse no podio, aínda que lonxe dos dous primeiros.

O primeiro Rally da Mariña tamén deixou os típicos accidentes que non pasaron a maiores, aínda que un dos pilotos foi trasladado ao Hospital da Mariña para someterse a unha observación tras chocar o seu coche nas Negradas. Tamén houbo colisións na zona de Castelo, en Cervo.


Unha das incidencias máis rechamantes tivo lugar coa suspensión do segundo tramo de Cervo ao querer un veciño pasar co seu coche polo circuíto habilitado para os coches. A organización incluso recorreu á Garda Civil, xa que quedaban uns dez coches por pasar.