O home localizado morto nun piso de Granxas, na parroquia vivariense de Covas, puido falecer no mes de febreiro pasado, segundo os indicios con que traballa a investigación, en mans da Policía Nacional. Os propietarios do inmoble en que residía de aluguer, que viven en Reino Unido e contan con outra vivenda á beira, detectaron mal cheiro no inmoble ao regresar de vacacións, razón pola que requiriron a presenza das autoridades para acceder ao piso.
Os axentes acharon no interior ao finado, nacido no ano 1950, sobre a cama e en avanzado estado de descomposición. Pénsase que o óbito puido producirse durante o pasado mes de febreiro, data desde a cal debía o importe do aluguer aos donos do piso. Estes contactaron entón coa inmobiliaria a través da que arrendaron o inmoble e esta con un irmán do home, quen lles indicou que este tiña intención de irse a unha residencia, aínda que lles estrañou que non avisase, ninguén acudiu á vivenda a comprobar se continuaba alí ou non, a pesar de que sempre abonara a renda de xeito puntual.
As autoridades non puideron confirmar a través da pegada dixital que a identidade do finado corresponda coa do inquilino, debido ao tempo transcorrido, razón pola que tomarán mostras de ADN a un irmán que reside en Barreiros para verificar se se trata do mesmo home, quen residía desde hai anos no municipio vivariense. O forense levantou o cadáver na noite do pasado venres, á espera de que as análises pertinentes confirmen a súa identidade.
