O xulgado de primeira instancia número 1 de Viveiro instruíu unha causa contra un home, R.F.S., que arrastra nove condenas firmes por delitos de malos tratos, violencia no ámbito familiar ou quebrantamentos de condena e que irá a xuízo a semana que vén. Neste caso, acúsaselle de ser o presunto autor dun delito de roubo con violencia en grao de tentativa e dous delitos máis de lesións que cometería cando nas proximidades do festival Resurrection Fest tratou de arrincar unha pulseira para acceder ao recinto a un home que se dispuña a entrar no festival.
Segundo a Fiscalía, R.F.S. atopábase en compañía doutras dúas persoas cando tratou de facerse coa pulseira do home, aínda que estes dous non puideron ser identificados.
Estes feitos producíronse ao redor das tres e media da mañá do 10 de xullo de 2016 e nese momento o acusado acumulaba ata nove condenas firmes por actos violentos ou por quebrantamentos de condena. Tiña delitos por malos tratos no ámbito familiar en 2008 e ese mesmo ano por quebrantamento de condena, outro delito de lesións en San Sebastián en 2010, outro máis de malos tratos no ámbito familiar en 2011 en Santiago, quebrantamento de condena en 2012, dous delitos de malos tratos, outro de ameazas e outro quebrantamento de condena, todos en 2018.
