O coñecido artista de Alfoz, Hipólito Xeada e a valadourense Selmira Balseiro son a representación mariñá no certame de pintura mural Amarte, que o xoves empezou en Burela e que acabará o domingo coa entrega de premios.
Xunto a eles pintarán as súas obras no muro do porto burelense outros oito artistas: Marcos Pereira, Daniel Mayobre e Manuel Andrés Pallín de Lugo, Martín Cal de Ortigueira, Delio Rodríguez de Vigo, David Muñoz da Coruña, Fernando García Sarabia de Madrid e Eneko Azpirotz Turnes de Pamplona.
Estes dez traballos foron elixidos entre os 33 que se presentaron á segunda convocatoria do certame burelense e entre os que se atopaban dous aspirantes mexicanos. Os primeiros artistas xa empezaron este xoves a plasmar as súas obras no muro portuario e recibiron a visita do concelleiro de cultura burelense, José Díaz.
Os seus dez traballos, todos eles inspirados no mar, uniranse ás que xa hai pintadas da primeira edición do certame e converteranse nun reclamo máis para visitar o porto. A estas obras sumarase a do artista invitado, que nesta edición é Otero Regal, que fará un mural de cerámica seguindo a súa especialidade artística.
O gañador do certame levará 1.200 euros, o segundo 600 e o terceiro 300. O mellor artista local levará 300 euros e o resto de finalistas, 100.
