A última campaña de vacinación fronte á gripe pechouse nos centros de saúde da comarca con 16.493 persoas vacinadas, segundo os datos achegados polo Sergas. Esta cifra supón un incremento de 940 persoas con respecto á anterior campaña, de 2018.
O número de persoas vacinadas incrementouse na maior parte dos centros de saúde, fóra dos de Lourenzá e Barreiros, onde houbo pequenos descensos. Así, en Lourenzá vacináronse en 2018, 618 persoas e na última campaña, 604. En Barreiros foron 673 fronte a 693.
Os centros de saúde que rexistraron máis vacúas foron os de Viveiro, Foz, Ribadeo, Burela e Mondoñedo. Estes datos reflicten unha mellora dos resultados no quese refire á cobertura da poboación.
A vacina antigripal non só evita casos se non que tamén diminúe a frecuencia das complicacións derivadas da enfermidade, así como o risco de hospitalización e a morte relacionada con ela. Por iso, desde o Sergas inciden na necesidade de vacinarse á poboación que se inclúe nos grupos de risco.
Nesta campaña de 2019 empregáronse tres tipos de vacina: a tetravalente de cultivo en ovo, que podía ser utilizada na poboación infantil, con patoloxía de base, de seis meses ata os 14 anos; a tetravalente de cultivo celular, que se empregou por primeira vez para as persoas con factores de risco de 15 a 64 anos e tamén indicada para embarazadas; e a trivalente adxuvada, para todas as persoas de 65 anos ou máis ingresados en residencias ou non e que se corresponden co grupo con maior risco de ter complicacións.
