A segunda edición das carreiras de cabalos disputada este domingo en Celeiro (Viveiro) xerou gran expectación entre o público asistente a esta cita. A organización, a cargo de Cabaleiros do Landro en colaboración co Concello, mostrouse moi contenta do desenvolvemento das competicións. "Foi de marabilla, viñeron vos 150 cabalos previstos dende diferentes puntos de Galicia, os mellores da comunidade, e tamén houbo bastante xente", dixo Pedro Pardo.
Tanto os organizadores como os participantes tiveron que empregarse a fondo, debido ao gran número de équidos, o que prolongou a duración do evento, dado que primeiro disputáronse as mangas das semifinais e despois medíronse na final. Na xornada matinal luciu un sol espléndido, aínda que o orballo apareceu á primeira hora da tarde, pero ás seis escampó e o público aguantou no campo de Lavandeiras.
A Policía Local controlou os accesos á zona xunto a Protección Civil, que tamén estivo na entrada do recinto. O persoal de Ambulancias Burela atendeu a un xinete que se lanzou dun équido que non paraba de correr, acabou exhausto tras dar varias voltas pola pista, pero sen lesións.
A entrega de premios foi ás oito da tarde. En galope de menos de 1,50 metros impúxose Sergio Mato con Iscar, en máis de 1,50 o primeiro foi José Manuel da cuadra Lima, con Karar. A modalidade de raza árabe e pura raza galega tivo un claro vencedor, Sergio Bouzas, quen gañou a primeira a lombos de Siul Kegens e a segunda, con Pitufiña. En andaina chapeada de menos de 1,50 gañou Borja Rodríguez, con Kin; na de máis de 1,50 impúxose Jaime Carro, con Lucas; en andaina serrada de menos de 1,50 gañou Miguel Ángel González, con Pitufo e na máis de 1,50 Adrián Sánchez, con Lakevienlu Rápido.
