O tramo da antiga estrada N-642 que discorre pola zona de A Espiñeira, entre os concellos de Barreiros e Foz, está a ser obxecto dunhas obras de remodelación do firme que se iniciaron o pasado martes.
Uns traballos que acomete o Ministerio de Transportes, Mobilidade e Axenda Urbana (Mitma), atendendo unha petición dos propios veciños, que trasladaron a súa proposta aos responsables municipais e estes á súa vez ao Goberno central, a través da subdelegada na provincia de Lugo, Isabel Rodríguez, quen foi tamén a encargada de adiantar o inicio das obras, que está previsto que conclúan nesta mesma semana, pois a execución é sinxela e o prazo para a súa posta en marcha é apenas duns días.
Preto de 50.000 euros, en concreto 48.324, é o custo destas melloras, que consisten na reparación do firme que se atopaba bastante deteriorado, unha calzada que ademais de contar con novo aglomerado pintarase para garantir a seguridade dos seus usuarios, que é a parte que falta por executar.
A acometida destes traballos é unha reclamación dos veciños para un viario que é bastante usado por moitos automobilistas e soporta a diario bastante tránsito, polo que a súa mellora era unha necesidade polo estado do firme.
