O goberno de Xove, en mans do Partido Popular, aprobou este luns os orzamentos municipais para este exercicio co voto contrario do BNG. O alcalde, Demetrio Salgueiro Rapa, reprocha á devandita formación que non fixese ningunha achega, a pesar de que "a miña man sempre estivo tendida". O rexedor destaca que inclúe "obras importantes en moitas zonas do concello". A entidade local manexará 9.410.000 euros, que conforman o capítulo de ingresos, mentres que os ingresos son 7.200.000 euros.
A lei de estabilidade orzamentaria obriga a aprobar con superávit inicial o proxecto, pero eses fondos poden ser usados ao longo do ano, igual que o remanente de tesourería. A cifra é similar á do exercicio pasado na súa distribución, pois o persoal absorbe 2.848.500 e a gastos correntes de bens e servizos destínanse 2.824.000 euros. O Concello reserva ademais unha cantidade relevante (528.600) para axudas ao estudo e a colectivos ou plan de emprego. "O gasto social é importante, máis do 7% do presuposto, que permite dinamizar a actividade local", subliña Salgueiro.
Os ingresos por impostos -Ibi, Ivtm e IAE- suman 3.955.000 euros, mentres que as taxas e ingresos pola instalación de liñas eléctricas ascenden a 4 millóns. As transferencias doutras administracións son de 1.180.280.
Os investimentos previstos roldan o millón de euros (996.518), co "fin de seguir mellorando as infraestruturas e servizos que dá o Concello", sinala o alcalde, quen apunta que contemplan obras de todo tipo. Entre elas figura a compra de mobiliario para a vivenda do director do colexio por 7.000 euros. Outros 45.000 para adecuación e control telemétrico dos depósitos de auga mediante unha App ante avisos de perda de auga ou baixada do nivel e para actuar ante calquera avaría.
O goberno xovense espera dedicar 153.000 euros a aforro enerxético, 38.400 procedentes de fondos propios. Prevé outros 30.000 para comprar terreos para áreas recreativas, 50.000 para a reparación das filtracións na área acristalada que conecta o pavillón e a piscina. Tamén destinarán 16.000 euros a equipamento para o ximnasio municipal e 37.000 para substituír o ascensor do consistorio adaptándoo para o acceso de persoas con mobilidade reducida.
O acondicionamento da parcela que ten no polígono de Camba levará 46.000 euros, outros 140.000 serán para repoñer o valado de madeira na ruta dos Muiños, que substituirán por un de plástico reciclado que imita madeira para gañar durabilidad. A compra dunha marquesiña para o autobús suporá 10.000 euros, destina outros 30.000 para restaurar fontes no municipio e unha partida específica de 39.000 para a de Mol (Sumoas) con axuda do fondo de compensación ambiental. O Concello achegará 23.000 dos seus fondos.
O plan de mellora de camiños de Agader achegará 50.000 para o arranxo e pavimentación con aglomerado en quente do camiño de Ventoselle a Cortellos, ao que dedicarán 86.600 en total. Outros 260.000 son para seguir a mellora da rede viaria municipal. O Concello prevé continuar así mesmo co arranxo das pistas da Deputación.
