O Goberno central destinará 20 millóns de euros para paliar os danos producidos polos ataques de lobo no ano 2022. Así o anunciou o senador do PSOE César Mogo, quen indicou que ese diñeiro é "dez veces máis do que hoxe paga o conxunto de comunidades en toda España".
Mogo recoñece que agora hai superpoblación de lobo pero di que pode ser controlada, pero tamén engade que para iso se faga, e que o Goberno da comunidade autónoma "tamén ten que facer o seu traballo". Con todo acusa Xunta de non realizar ningún tipo de movemento nas súas competencias para atallar os problemas que están a xerar os ataques que se están cebando especialmente con gandeiros da Mariña.
Segundo explica Mogo, o Executivo autonómico "abandonou por completo as súas responsabilidades de xestión do Plan do Lobo: sen revisar en máis de 13 anos, sen censo de animais desde 2014, sen protocolos de actuación e pagando tarde, mal e arrastras. é aí onde se deberían tomar medidas e non se fixo".
Considera o responsable socialista que "é máis fácil, claro, intentar desviar a atención con afirmacións que nada teñen que ver cos intereses dos gandeiros, que arrimar o ombreiro".
Estratexia
Tamén di que hai que pór en marcha unha estratexia sobre o lobo "como está a elaborar o Goberno, que protexerá a agricultores e gandeiros".