Segundo informou a propia Benemérita, desde este mércores e ata o vindeiro venres, os axentes da Garda Civil da Comandancia de Lugo contarán co apoio do Grupo de Reserva e Seguridade (GRS), con sede en Pontevedra.
Trátase da principal unidade de reserva da Garda Civil, concibida e preparada para cumprir misións específicas relacionadas co mantemento, ou no seu caso restablecemento, da seguridade pública.
Ademais, a eses labores de vixilancia incorpóranse tamén desde hoxe os medios aéreos da UHEL -a unidade de helicópteros da Garda Civil-, neste caso con sede na Coruña.
Desde a madrugada do pasado luns, a Garda Civil despregouse nos principais accesos á comarca da Mariña para controlar as entradas e saídas, prohibidas como norma xeral ata o vindeiro venres para evitar a propagación do Covid19.
