A Garda Civil tivo que acudir na mañá de onte á praia de Fontela-Valea de Barreiros, alertada por unha pelexa no areal entre dous familias que gozaban dos intermitentes raios de sol cos que amenceu a xornada. Ao parecer, unha travesura dos nenos lanzando area está detrás do conflito, no que se encerellaron varios adultos, algún dos cales presentaba un golpe na cara.
Os servizos de socorrismo do areal optaron por chamar ás forzas da orde ante o feito de que o enfrontamento puidese ir a máis, aínda que a disputa quedou aí e ningún dos implicados no altercado quixo presentar finalmente denuncia.
As dúas familias son vereantes que se achegaron onte ata a area barreirense, onde pouco antes, o socorrista de garda tivo que auxiliar a un surfeiro ao que arrastraba a corrente.
Un rescate sen complicacións, que foi máis ben unha axuda ao deportista, que puido saír sen problema da auga, polo que non houbo necesidade de que interviñese a zódiac, preparada por se a situación se complicaba.
O mar estivo difícil durante toda a xornada de onte no litoral mariñán, especialmente en praias abertas como as de Barreiros.