A declaración do estado de alarma fixo que a oficina de atención ao público de Viaqua en Ribadeo, a empresa concesionaria do servizo de auga, pechase as súas portas temporalmente. Pero pasaron máis de sete meses desde entón e ese local de atención ao público agora faio presencialmente só con cita previa, o que está a xerar unha ampla serie de queixas veciñais que se incrementaron debido a unha factura por estimación realizada o mes pasado.
Os veciños lamentan sobre todo que non son atendidos a ningunha hora e que cando chaman por teléfono teñen problemas para contactar con alguén e, se o logran, sempre é persoal doutras localidades, nunca de Ribadeo. Tamén indican que aínda que saben que hai unha web para facer os trámites, moita xente non sabe utilizala.
VIAQUA. Fontes da empresa, pola súa banda, explicaron este martes que a atención nas súas oficinas foise adaptando con novas canles como a oficina virtual e a atención telefónica, pero rexeitan que a oficina estea pechada, senón que se abre "sempre que sexa necesario" con cita previa.
Explican que ao iniciarse a pandemia puideron continuar traballando cos seus técnicos, primeiro desde casa e agora cun modelo adaptado "pensado para que a atención non se frease nunca". Pero recoñecen que a pandemia segue aí e "pretendemos protexer aos nosos traballadores e aos veciños e que a nosa actividade non sexa un foco de propagación do virus, porque ademais é importante pensar que se hai un positivo xeraría illamentos importantes e problemáticos".
En todo caso, subliñan que a xente pode chamar e aténdenlles operarios cualificados de Galicia que lles solucionan o problema se poden ou, se non, trasládano ao traballador de Ribadeo para establecer unha cita "e farase os días á semana que faga falta".
Engaden que "incluso hai opción de pedir cita con día e hora a conveniencia do usuario" pero se atende primeiro por teléfono "porque enfada moito chamar a un sitio e que non che contesten".
