A FP Dual experimentará no curso 2020-21 un impulso para o que se empezará a traballar no próximo mes de setembro. Coordinarao o profesor ribadense Álvaro Doural, que xa fixo unha aposta forte no Porta da Auga de Ribadeo coa oferta desta formación en Carrocería, Construción e Atención a Persoas en Situación de Dependencia. Este sistema educativo que mestura formación con implantación no mercado laboral é a día de hoxe un método practicamente garantido de acceso ao mercado laboral debido ás dificultades que atopan moitas empresas de distintos sectores para atopar profesionais preparados dispostos a comezar a traballar.
Aínda que a día de hoxe a oferta na Mariña é, ademais da do Porta da Auga, de Aproveitamento e Conservación do Medio Natural no IES Plurilingüe San Rosendo e de Dirección de Cociña e Servizos de Restauración no IES de Foz, Doural avanza que as súas aspiracións son que esa oferta creza notablemente e para iso o seu traballo consistirá en pór en contacto a empresas e alumnos.
Xa o está facendo e recorda que a aspiración da FP Dual é "chegar a todos os sectores produtivos". Pero para iso en setembro vai realizar un estudo "das necesidades reais que existen no mercado" pero que el, dada a súa experiencia, xa sabe que "son moitas e moi variadas". Para iso manterá reunións con empresarios e con responsables de centros educativos aos que exporá claramente o proxecto. En esencia este consiste en formarse no centro e durante o curso realizar xa prácticas remuneradas en empresas cotizando á Seguridade Social.
Álvaro Doural explica que coa expansión da FP Dual non se trata de desmontar nada do que existe actualmente, senón simplemente dar outra opción.
Ademais, a idea é que esas opcións que se dan estean enmarcadas no territorio "de xeito que, por exemplo, se facemos algo vencellado ao mar ou que ten máis sentido é que se imparta en centros de Burela ou de Viveiro, que é onde eses sectores teñen unha maior implantación".
GRANDES EMPRESAS. Unha idea que baralla é tratar de traballar a fondo con grandes empresas como poden ser Reny Picot ou Ence, ambas de Navia, "porque demandan unha gran cantidade de traballadores que non sempre se pode satisfacer e por iso nos gustaría poñernos de acordo con eles como con outras como pode ser Gondán, por exemplo. Hai que falar con elas para coñecer que tipo de perfil é o que lles encaixa máis e así nós poder afinar tamén na nosa oferta e complementarnos".
Da experiencia que xa ten Álvaro Doural di que a idea é moi ben acollida polas empresas. En canto ao alumnado, a cousa vai máis ou menos ben e por exemplo no caso da oferta de Atención a Persoas en Situación de Dependencia de Ribadeo o número de prazas dispoñible está practicamente cuberto.
Cre que isto mellorará "porque non estamos a inventar nada. Funciona moi ben en moitos países de Europa e as porcentaxes de inserción laboral que hai son inmellorables".
CARACTERÍSTICAS. A característica máis importante que ten a FP Dual é que a partir do cuarto mes de clases no centro o alumnado pasa xa a un centro de traballo onde realizará un traballo remunerado mentres se segue formando. Por iso Doural indica que o alumnado que chega "son persoas que queren empezar a traballar xa".
Outro factor importante é que todo o alumnado de FP Dual é maior de 18 anos. Con esa idade e xa con certa andaina vital, a formación que se obtén abre de forma rápida as portas a un mercado laboral ao que se vai a tiro fixo e con demanda de empresas interesadas.
SEN INTERACCIÓN. A pesar de ser un ensino de Formación Profesional, as de tipo Dual impártense por separado dos ciclos ordinarios regulados xa que o seu funcionamento non é o mesmo nin tampouco están dirixida exactamente ao mesmo tipo de alumnado.
